Aug 16, 2007

بنحبك يامصر


عايشين دايما في غربه جواكي يامصر ونقول دايما بحرقه بنحبك يامصر, فيكي شئ غريب مغربنا معاكي في عتمه وليل طويل وبنحبك يامصر, بنضحك نخفي دموعنا بنصرخ كان مين سمعنا عارفين أنك ضحيه وبنحبك يامصر, عيشي وأوعك تموتى حسي الخوف من سكوتي أن يسكت يوم لساني يتكلم حد تاني ويقولها بعلو صوته بنحبك يامصر, عارف كلك جراح فاكره المجد اللي راح مأسوره في ليل طويل وعايزه تشوفي الصباح بتقولي أنك مريضه وهقولك ايه يابلدي سلامتك أه يامصر, نموت بس أنتي عيشي وهنعيش تاني في ترابك ونبقى حته منك وهييجي غيرنا يقولك بنحبك يامصر, يابلدي ولادك كتير عايشين شايفيين كتير منهم عارفك ضحيه ومنهم شايفك قسيه ودول ودول يابلدي بيقولوا تحيا بلدي بنحبك يامصر, حتى اللي سرقوه خيرك وحبوه واحده غيرك بيحبوكي يامصر بيحبوا فيكي صمتك بيحبوا فيكي صبرك عليهم يامصر ومن أمتى بيخدعونا دا قلبهم يابلدي يسيع لألف واحده وقلبنا ياغاليه مفيهوش غير انتي واحده بنقولها أحنا ليكي بنحبك يامصر وساعات نسمعها منهم بنحبك يامصر مع أن الكلمه واحده لكن معناها غير, حبهم باينله شهوه وحبنا دا كله خير وطبعاً أنتي عرفه بنحبك يامصر



Labels:

27 Comments:

Blogger عاشقة الوطن said...

السلام عليكم

ازيك ياعيون مصر
انت عارف على الرغم ان مصر كتير بتبقي قاسية على ولادها وعلى الرغم القرف اللى بنشوفه من حكامها ومن اللى ماسكنها بس برضه بنحبها ومنقدرش نستغنى عنها
على الرغم اننا بننبعد بنسافر ونمشي لبلد تانية بس برضه بنحبها
على الرغم من قسوتها كتير علينا هنفضل برضه نحبها

تحياتى ليك ولمصر

August 16, 2007 at 6:17 PM  
Blogger Tesla said...

أنا عاوز أقولك أني قشعرت بجد من الكلام ده
جامده بجد, مع ان من كتر اللي سمعته من شتايم فيها مش مصدق أن لسا في ناس بيحبوها أوي كده
أنت هايل
استمر و ربنا معاك

August 17, 2007 at 4:15 PM  
Blogger EGYPT EYES said...

عاشقة الوطن
..............
وعليكم السلام
الحمد لله عاشقة الوطن ربنا يخليكي
متفق معاكي طبعا في اللي قولتيه
تحياتي ليكي وللوطن اللي أنتي بتعشقيه

August 17, 2007 at 4:32 PM  
Blogger EGYPT EYES said...

Tesla
..............
اهلا بيك دايما في المدونه ياصديقي
بشكرك على كلماتك الجميله
تحياتي لك

August 17, 2007 at 4:33 PM  
Blogger يقين النصر said...

تذكرت أبيات من الشعر للشيخ عائض القرنى فى مصر...
ولمصر فى قلب الزمان رسالة..مكتوبة يصغى لها الأحياء
من مصر تبدأ قصة فى طيها... تروى الحوادث للعلا سيناء
مامصر الا الفجر والدمع السخى ...وانها سر المحبة حاءها والباء
اذا كانت هذه مشاعر غريب فكيف بمشاعر القريب...
مهما عملوا فيها هفضل أحبها..
أعمل ايه؟؟ مصر

August 17, 2007 at 4:55 PM  
Blogger EGYPT EYES said...

يقين النصر
..............
أختي العزيزه يقين النصر أولا اهلا بيكي منوراني

فعلا حتى الغريب عن بلدنا واقع في حبها فمابالك بولادها
تحياتي ليكي

August 17, 2007 at 5:19 PM  
Blogger دنـيـا محيراني(ايناس لطفي said...

عزيزي عيون مصر انا مش عارفه اقول ايه بعد احساسك العالي ده و كلامك الجميل الاي حسيت انه دخل قلبي و عقلي كمان برغم كل شيء برغم ظلم اهلك لبعض برغم الفساد و الفقر و الجهل و المرض برغم الغربه الاي جوه الوطن و بره كمان هانفضل نحبها عشان هي مش مجرد بلد او مكان عايشين فيه هي دمنا الاي بيجري في عروقنا و قلوبنا الاي بنعيش بها المشكله في اهلها و الاي بياكلوا من ارضها و بيسرقوا عرضها المشكله فينا احنا ام هي زي الام بتدي من غير حساب اديتنا ميتاه فلوثنها و ادينتنا ارضها فجرفنها و ادينتنا سماءها فغيمناها و ادينتنا ناس طيبين ظلمنهم و دوسنا علي رقابهم
برغم +كل شيء بنحب و الله العظيم بنحبها انا جاءت اعلق لقيت نفسي بكتب بوست معلش بقي يا عيون اعمل ايه احساسك حلو و كلامك حلو فلازم الرد يبقي حلو
تحياتي

August 17, 2007 at 6:39 PM  
Blogger أمير القلوب said...

كلمات أكثر من رائعة،خرجت من قلب صادق الإحساس.، ومادام شربنا من نيلها يبقى أكيد لازم نحبها.،مهما نهبوا وسرقوا خيرها مهما خوفونا أو ضايقونا حنفضل نحبها، لأنها بإختصار هي أمننا هي حلمنا هي دمنا وبرضه بنحبك يامصر

August 17, 2007 at 7:23 PM  
Blogger Doaa Ebrahim Aaql said...

كلامك جميل اوى
واكتر حاجة حسيتها
إننا بنحس بغربة جواها
تفتكر ليه
عشان يمكن مش حاسين بأمان
مش حاسين إننا لو اتظلمنا
فى حد هينصفنا فيها
ويرد لنا حقنا
مصر مش قاسية علينا
إحنا بنحبها بس مغلوبين
بس اكيد مش هنفضل كده كتير

تحياتى لكلامك الرائع

August 18, 2007 at 4:01 AM  
Blogger مصطفى محمود said...

والله الواحد مهما اتمرمط فى البلد دى لسة بردة بيحبها ...تقولش لعنة !!

August 18, 2007 at 10:07 AM  
Blogger EGYPT EYES said...

دنــــيــــــا مـحـيـرنـي
............................
شكرا ليكي دنيا لو الكلام جميل يبقى عشان تعليقك موجود عليه
تحياتي وتقديري الدائم

August 18, 2007 at 10:08 AM  
Blogger EGYPT EYES said...

أمير القلوب
.............
أكيد ياأمير هنفضل نحبها مصر وطن يعيش فينا
تحياتي

August 18, 2007 at 10:11 AM  
Blogger EGYPT EYES said...

princess dodo
.................
شكرا ليكي برنسيس منوراني
فعلا مصر مش قاسيه علينا هي ضحيه زي ولادها وطول ماولادها بيحبوها يفضل لنا أمل
تحياتي

August 18, 2007 at 10:14 AM  
Blogger EGYPT EYES said...

مصطفى محمود
.............
أهلا بالرفيق مصطفى منورني D:

حبنا ليها نعمه يادرش وحبنا ليها هيكون هو الأمل لبكره
تحيه حمراء من أجلك ):

August 18, 2007 at 10:22 AM  
Blogger عين ضيقة said...

كويس انك استدركت وقلت مش شعر

بس سيبك انت بتحب مصر وزملكاوى كمان

هنيجى هنا كتير كده

شكرا لزيارتك كتير

August 18, 2007 at 9:55 PM  
Blogger EGYPT EYES said...

عين ضيقة
..........
هههههههههه ايه معناها استدركت دي بقى D:
تنوريني يازملكاويه طبعا
وبالمناسبه انا هغير ليست شعرا دي وأخليها شعر اشمعنى أنتم يعني شعرا D:
تحياتي

August 18, 2007 at 10:20 PM  
Blogger نانو said...

ايه الكلام الجميل ده بصراحة بجد احساسك عالى جدا وكلامك يتحس مش يتقرأ انت عارف انا عايشة فى مصر بس وانا بقرأ كلامك ده حسيت زى ما تكون مصر وحشانى أوى وعايزة اجرى واترمى فى حضنها أمال بقى لو كنت مغتربة كنت عملت ايه ؟
كلامك معبر وفعلا مهما نشوف منها بنحبها ونعشقها بنموت فيك يا مصر لانها ملهاش اي ذنب فى اللى بيحصل زى ما انت قلت هى ضحية مش جانى بنحبك يا مصر

August 19, 2007 at 3:04 PM  
Blogger EGYPT EYES said...

نانو
.......
أهلا بيكي نانو منوراني
طبعا بنحبك يامصر
وبنحبك يازمالك D:

August 19, 2007 at 5:54 PM  
Blogger ibn nasser - ابن ناصر said...

كلام جميل قوي قوي

تحياتي

August 19, 2007 at 9:17 PM  
Blogger EGYPT EYES said...

ibn nasser_أبن ناصر
....................
منورني ياصديقي
تحياتي لك

August 19, 2007 at 10:23 PM  
Blogger ابن رشد said...

برغم ان اللي يشفها من برة يقول وحشة و اللي يشوفها من جوة يقول اوحش بس لو بصيت جوة قلوبنا هتلاقيها اجمل بلد في الدنيا نعمل اية بنحبها

August 20, 2007 at 4:44 AM  
Blogger EGYPT EYES said...

shams
...........
أهلا بك منورني
أتفق معاك ان مصر في عيونا أجمل بلد في الكون
تحياتي

August 20, 2007 at 5:04 PM  
Blogger shorouk said شروق سعيد said...

و الله بحبك يا بلدي
مهما كنت

كلماتك جميلة جداً

August 21, 2007 at 1:22 AM  
Blogger Layla said...

جميلة قوي

تحياتي :))

August 21, 2007 at 2:04 PM  
Blogger Sha2loob said...

على اسم مصر التاريخ يقدر يقول ما شاء
أنا مصر عندي أحب وأجمل الأشياء
باحبها وهي مالكه الأرض شرق وغرب
وباحبها وهي مرميه جريحة حرب
باحبها بعنف وبرقة وعلى استحياء
واكرهها وألعن أبوها بعشق زي الداء
واسيبها واطفش في درب وتبقى هي ف درب
وتلتفت تلقيني جنبها في الكرب
والنبض ينفض عروقي بألف نغمة وضرب

بصراحة ملقيتش حاجه أجمل من كده أعلق بيها عليك

August 21, 2007 at 4:27 PM  
Blogger EGYPT EYES said...

إنسانة من مصر
...............
أهلا بيكي أنسانه منوراني
تحياتي ليكي


Marvel - واحد زهقان
.....................
شكرا ليك ياصديقي منورني

تحياتي لك

Sha2loo
..........
أهلا بيك شقلوب منورني ديما وتعليقك اجمل بكتير طبعا من كلمات البوست طبعا
تحياتي الكبيره ليك

August 21, 2007 at 8:44 PM  
Blogger lonlysmily said...

محبتش غير بلدى علشان معرفتش غيرها
عيشت فى بلدى ومش راضى الا غيرها
قولت اعيش راضى ملقتش الا هوانها
قررت انى اسيبها وارجعلها وانا اد جبروتها

انا بجد بحب مصر اوى وبحاول على اد ما اقدر انى اغير حجات بشوفها مش صح واساعد ناس انداس عليها بس خايفه يجى عليا انا يوم وينداس عليا وساعتها مش هقدر استنى فيها
والمشكله انى بدات ابص لبرة بدات فكرة انى اسيبها.....للاسف

September 16, 2007 at 1:05 AM  

Post a Comment

Subscribe to Post Comments [Atom]

<< Home

استقلال القضاء حق كل المصريين
حقوق النشر غير محفوظه ولا يهم ذكر المصدر